این اے 122 میں انگوٹھوں کی تصدیق کی رپورٹ جمع کرا دی گئی
- 58 منٹ پہلے
پاکستان میں قومی سطح پر کوائف اکھٹا کرنے کے ادارے نادرا نے قومی اسمبلی کے حلقہ این اے 122 میں انگوٹھوں کے نشانات کی تصدیق کے حوالے سے اپنی رپورٹ لاہور میں الیکشن ٹربیونل کے دفتر میں جمع کروا دی ہے۔
سنیچر کو نادرا کی جانب سے جمع کروائی جانے والی یہ رپورٹ تقریباً 800 صفحات پر مشتمل ہے۔
خیال رہے کہ الیکشن ٹربیونل قومی اسمبلی کے سپیکر ایاز صادق کے خلاف تحریک انصاف کے سربراہ عمران خان کی جانب سے دائر اِنتخابی عذرداری پر سماعت کر رہا ہے۔
نادرا کی جانب سے الیکشن ٹربیونل میں رپورٹ جمع کرائی جانے والی رپورٹ منظر عام پر نہیں لائی گئی تاہم اس رپورٹ کے بارے میں ایاز صادق اور عمران خان کے وکلا کے جانب سے متضاد بیانات سامنے آ رہے ہیں
عمران خان کے وکیل انیس ہاشمی نے میڈیا سےگفتگو میں کہا کہ ’این اے 122 میں ڈالے گئے ووٹوں میں سے ایک لاکھ 36 ہزار ووٹوں کی تصدیق نہیں ہو سکی ہے جبکہ 370 ووٹ ایسے ہیں جن کا شناختی کارڈ نمبر کاؤنٹر فائل پر درج ہی نہیں ہے۔‘
وکیل کے مطابق 6123 ووٹ غیر تصدیق شدہ شناختی کارڈز پر ڈالے گئے ہیں جو کہ بوگس ووٹ ہیں۔
جبکہ دوسری جانب ایاز صادق کے بیٹے علی ایاز صادق کا نادرا کی رپورٹ کے حوالے سے کہنا تھا کہ’ایک لاکھ 84 ہزار ووٹوں میں سے صرف 51 ووٹوں کی تصدیق نہیں ہو سکی جبکہ باقی تمام ووٹوں کی تصدیق ہوئی ہے۔‘
علی صادق کے بقول رپورٹ کے مطابق ڈالے گئے ووٹ کے انگوٹھے کے نشان کا کاؤنٹر فائل کے انگوٹھے کے نشان کے ساتھ بھی موازنہ کیا گیا ہے اور ’جتنے بھی ووٹوں کی جانچ پڑتال کی گئی وہ سارے کے سارے تصدیق ہوئے ہیں یعنی غیر تصدیق شدہ کا نمبر ہے صفر۔‘
الیکشن ٹریبیونل نے اِنتخابی عذرداری پر مزید کاروائی 16 مئی تک ملتوی کر دی ہے۔
الیکشن ٹربیونل نے قومی اسمبلی کے حلقہ این اے 122 میں گذشتہ انتخابات میں ڈالے گئے ووٹوں کے تھیلے کھولنے کا حکم دیا چار دسمبر 2014 کو دیا تھا۔
خیال رہے کہ چند دن پہلے ہی الیکشن ٹربیونل نے اِنتخابی بے ضابطگیوں کے باعث لاہور کے حلقہ این اے 125 میں دوبارہ الیکشن کروانے کا حکم دیا تھا۔
Comments
Post a Comment