#LIVEANDLETTOLIVE

دہشتگردوں کا مقصد قوم کو مفلوج اور تقسیم کرنا ہوتاہے ، وزیر داخلہ

تاریخ اشاعت : 16  مئ  2015آج کی اہم خبریں, جیو پاکستان

راولپنڈی ……وزیر داخلہ چوہدری نثار علی خان نے کہا ہے کہ دہشتگردوں کا مقصد دہشت پھیلاکر قوم کو مفلوج اور تقسیم کرنا ہوتا ہے ، واقعات کے بعد استعفوں کے مطالبات ان کے مقاصد کو پورا کرتےہیں ، آخری دہشتگرد کے خاتمےتک اُن کیخلاف جنگ جاری رہے گی اور ہم یہ جنگ جیت کر رہینگے۔ راولپنڈی کے علاقہ کل سیداں میں ورکرز سے خطاب میں ان کا کہنا تھا کہ دہشتگرد حملے دنیا بھر میں ہوتے ہیں، وہاں کوئی استعفی نہیں مانگتا ،یہ جو انقلاب کے دعوے کرتے ہیں یہ قوم کو تقسیم کرنے کی سازش ہے ، نئی سیاسی جماعت بھگوڑے سیاستدانوں کو اکٹھاکرنے کا جگتو فرنٹ ہے ۔وزیرداخلہ کا کہناتھاکہ ملک میں چن چن کر بے گناہ لوگوں کو قتل کیا جاتا ہے ،کرسچین،شیعہ اور اسماعیلیوں کو ماراگیا، اقتدار سنبھالا تو ہر روز دھماکے ہوتے تھے، سیکیورٹی صورت حال بہتر ہوئی ،مطمئن نہیں ہونا چاہیے ، مزید کام کی ضرورت ہے ، آرمی ،انٹیلی جنس ادارے وفاقی اور صوبائی حکومتیں ملکر دہشتگرد حملے روک سکتے ہیں۔ چوہدری نثار نے کہا کہ یہاں صوبائی وزرائے اعلیٰ سے استعفے طلب کیے جارہے ہیں ، میں اس عمل کی حمایت نہیں کرتا ۔تحریک انصاف سے متعلق تبصرہ کرتے ہوئے انہوں نے کہا کہ نئی جماعت سیاسی جماعت نہیں بلکہ ایک فین کلب ہے ، اس پارٹی میں سیاست نام کی کوئی چیز نہیں ، یہ جماعت گالم گلوچ ، دبائو اور دھرنا دینے کی سیاست پر یقین رکھتی ہے، کل اگر اقتدار اس پارٹی کے نزدیک آیا تو پورے ملک میں دھرنے ان کے گلے پڑینگے، انقلاب لانا ہوتا تو خیبر پختونخوا میں انقلاب لاچکے ہوتے۔